20 – 28 September 2003
Elsje Scheffler
Om die 50ste bestaansjaar van die Stellenbosch Afdeling te vier, is ’n
weeklange mini-kamp in Jonkershoek en omgewing georganiseer. Met ingehoue asems
het die bestuur van die Afdeling die weer met die aanvang van die kamp dopgehou.
Die reën het gedreig om die mini-kamp in ’n nat onplesierige ondervinding
te omskep. Maar ten spyte van die dreigende onweerswolke het drie verskillende
groepe Sondag die triestige toestande aangedurf en in drie verskillende rigtings
in Jonkershoek in gevaar. Almal het natuurlik ’n tipiese Jonkershoek-dag
beleef – al vier seisoene in een dag!
Na die nat begin kon dinge net beter raak en is daar die res van die week omtrent
gestap en geklim en geklouter. Jonkershoek en omgewing het uitbundig saam feesgevier!
Die berge was vol bruisende watervalle en haastige waterstrome waar lang dorse
geles is. Die plate en plate veldblomme het die aandag van die steil hange en
moeë bene afgelei en jy kon jouself verloor in die detail van die blommeprag.
Wanneer die hellings wel te steil geword het was daar vele luilekker poele waarin
jy jouself weer kon verfris en waarlangs jy kon kuier.
Saans het ons tot laat om knetterende kampvure in die basiskamp gekuier. Daar
is tot laataand oor die dag se wonders en avonture gesels totdat moeë voete
en lywe ons tevrede na ons slaapsakke gedryf het.
Teen Vrydagmiddag het die naderende koue front die berge met ’n wolkekroon
begin versier en het dit die einde van die kamp aangekondig. Daar is vir oulaas
nog rondom die kampvuur gekuier voordat Saterdagoggend se reëns almal haastig-haastig
laat oppak het.
Een van die hoogtepunte van die kamp was die gedenk-hemde wat deur Capestorm
vir die geleentheid gemaak is. Die laatslapers was behoorlik groen van jaloesie
oor die hemde toe die ander breë-bors daarmee spog op elke uitstappie.
Twintig persone het vir die eerste helfte van die kamp ingeskryf, terwyl daar
26 deelnemers vir die tweede deel was. Deelnemers was van Oos-Kaap (4), Vrystaat
(2), Magaliesberg (2), Amajuba (1), Kaapstad (2), KwaZulu-Natal (1) en natuurlik
Stellenbosch (16) self. Daar was vier besoekers.